Escelente Articulu de C.X.BLANCO

Tres propuestes pa un Frente d´Esquierda Patriótica


Tres torpeos contra los colonialistes. Propuestes concretes de trabayu en comuña. Yo sé d´un torpéu que daría en tola llínea de flotación d´esti barcu que se noma Colonia. Esi misil diba ser l´espoxigue d´una esquierda nacionaliega que faiga allianza con un nacionalismu d´esquierda. L´orde de los términos tien el so aquello. Equí, nel País Astur, nun hebio una militancia marxista abondosa qu´arrenunciare del españolismu más recalcitrante. Tien aínda que dase un recambeu xeneracional pa que los pupilos de Moscú, del “eurocomunismu”del PCE y de la “progresía” d´IX adoptare posiciones de concenxa nacional, d´esquierda nacionaliega. Les fusiones de grupos y fracciones que dieron llugar al BNG gallegu, por exemplu, van en detrimentu d´una IX qu´en Galiza ye pamidea inesistente. Nun pais ablaýáu solo hai llugar, a la hora d´acabar cola situación Colonial, pa una esquierda “patriótica”. Los cancios de serena d´un “proletariáu universal” cuando ves que´l to mesmu país, la to xente de la redolada ta sometía a una opresión doble (opresión de clas y opresión nacional) nun pueden ser más míseres dende´l puntu de vista moral. Si n´Asturies quixéramos garrar el güe pelos cuernos, nun habría otro qu´un Frente Xúnicu empobináu a francer pa siempre´l bipartidismu afechiscao dende Madril pa nós. La llínea horizontal clásica derecha-esquierda diba francer de toes toes, una y bones los que se reclamen collacios de la clas trabayadora supieren que´l Facismu posmodernu ta guardáu dientro la esquierda “universalista” y oficial (PSOE-IX-BA-NUN SÉ CUÁNTO MÁS), tantu como metanes el conservadorismu más ranciu (PP-FAES). La estratexa daveres marxista, aplicada al casu asturianu, nun ye otra que fundir el stablishment bipartidista d´estilu español, somorguialu baxo´l mar. Hai un llabor misioneru del llau del nacionalismu pa comencer a los esquierdistes más arrechos a la hora de formar esi frente que, al tiempu que xunce a los asturianos que quieran camudar l´estatus quo de la “provincia”, tamién divide a los cipayos qu´alministren a la Colonia. Pa xuncir hai que dividir, ye una llei dialéctica. Ye nidio pa min que´l papelón d´IX-Bloque pal Engañu fasta la fecha foi una torga de les más cabezaleres nesi procesu del que falo. Pero yo nun duldo de la inxenua ya bona fe de dalgunos de los siguidores d´esi bloque de diseñu. Nun sedrán nacionalistes o nin siquiera ganarán muncho en concenxa nacional demientres sigan baillando alrodiu d´un partíu socialista que consideren a priori hexemónicu y como un “hermanu mayor”. Nun había que dar mensaxes confusos, dígolo polos esquierdistes asturianos: el PSOE ye enemigu d´Asturies, y puntu. Eso ta más que demostrao. Nada d´aquello no que participaron los monaciellos del socialismu hexemónicu –IX y bloque-de diseñu- pue ser bono pal País. ¿Nun vistis la famosa Llei d´Usu y Normalización” (o como se nome esa cosa tan fea y tan de medies tintes)? ¿Pa qué valió? A min, que me lo despliquen. L´otru díi, los carlistes (PCA) ni tan siquieramente pudieron presentar candidatures cola denomación n´asturiano. Una llei que nun val pa defender esi drechu electoral ye una puxarra, nun val nin pa llimpiase. Siéntolo, progresistes de les medies tintes. Podéis introducir tola verborrea y maquillaxe que queráis sobre´l “País”, sobre “l´autogobiernu”, “la identidá” y coses asina que salen gratis de les vueses boques. Pero fasta que nun dexéis de cooperar colos dominadores y vos pongáis a trabayar hombru con hombru con un Frente de Reconstruición Nacional, enfrente´l Poder, non al rau d´él, nun va haber cuasi naide que crea en vosotros. Güeyu colo que se noma “esquierda”, polo tanto, pente´l ruiu mediáticu. Yo falo de partíos y xentes qu´anden al debalu y que, nun siendo “nacionalistes”, tengan por embargu conciencia de qu´esti País cadez un Facismu mediáticu, empobináu dica´l bipartidismu xeneralizao nel Estáu, sacantes precisamente les comunidaes onde trunfa´l nacionalismu y onde pue abeyase una esquierda contestataria. ¿Xiraría´l PCPE dica un braeru PCPA, dica un partíu comunista del pueblu asturianu, dafechu, que trabayare a comuña col nacionalismu d´esquierda? ¿Queda xente comunista entovía n´IX que tea farta de la so podrén acelerá, que seya consciente de qu´Asturies ye un Pueblu Trabayaor que tien qu´esconsoñar? ¿Y el ecoloxismu? ¿Y...? Son entrugos, son hipótesis yo nun lo sé tovía. Yá dixi que lo de les coaliciones emprovisaes, por esperiencia, nun val un res. Meyor ta´l tema de aiciones concretes que garren abonda visibilidá. Pa que nun se diga que teorizo nel llimbu, na pura teoría estratosférica, doi unos exemplos: a) ¿Por qué nun se fai una pistonuda campaña anti-taurina esti branu na Feria de Begoña de Xixón? Si tan siquiera eses fuercies con resclavos y áscuares revolucionaries quieren “visibilidá” y esperimentar a ver si son quien a trabayar xuntes contundentemente en pro del País, podríen intentar qu´esi festexu anti-asturianu, sangrín, tercermundista y asquerosu nun se celebrare nunca más nesti País. Que los toros n´Asturies seyan espectáculu imposible dientro de les llindes de la nación. Toos xuníos, especialmente les mocedaes, a boicotear esa matanza d´animales. Por exemplu, por exemplu. b) ¿Por qué non esti añu que vien, cuando seya la entrega –tan humillante pa la nación Asturiana- de los Premios “Príncipe de Asturias” nun se fai sintir un braeru clamor popular, onde los cartelos d´un cientu d´asturianos dafechu, y non de combayones, glayen eso de “¡¡Asturies nun ye un Principáu!! Si eso saliere nun telediariu, anque seya un minutín, diba camudar la perceición internacional falsa de qu´esti ye un “Paraísu pal xubiláu” y una finca de recreu pal Borbón de turnu. Cuntái con que munchos combayones y paniaguaos van apellidar a una mera protesta pacífica, mentes tan solemne actu, como “agresión”... ¡Menudu imperiu l´Español, ¡menuda II Restauración Borbónica, que toles selmanes tien de facese la Víctima ¡ ¿Nun ye verdá? c) ¿Y qué me dicís del Desembarcu de Normandía braniegu repetíu nel Sable de San Llorienzu de Xixón? Paez ser que vamos tener esi condergáu ruiu d´aviones y ese amosadoriu impúdicu de militarismu, tolos branos equí, nun País que nun tien por qué ser español nin tampocu soportar eses bravates d´un exércitu que nun ye a atopar xente que lo sirva y tien de recurrir a estranxeros d´América. ¿Ye que nun hai que movilizase democráticamente contra esi espectáculu chornosu? O seya, y dígolo pa los que mos dedicamos al enseñu especialmente, o seya, que ta ún educando pa la paz a los mocinos adolescentes y vien esta institución armá a armanos baturiciu a una sociedá como l´asturiana que quier paz, que ye pacífica dafechu y foi, cásique fasta ayeri, cabezalera de la Insumisión? De xuru qu´hai una oportunidá nesa fecha. Nota: Como anéudota presonal, tando de paséu pelos Pericones, al aportar l´aviación española, vi a neñinos pequeños llorar, vi a perros soltase de la correa los amos y colar escopetaos, vi a vieyucos tapándose les oreyes... ¿Nun somos aparar esta vergoña belicista? Son idegues. Son idegues alrodiu d´eso que llevo diciendo sobre la visibilidá d´un movimientu revolucionariu nacional. Claro ye: que fuera de la xuventú nun hai salvación. Esi recambeu xeneracional tien que dase, enantes de que colen los mozos o los camuden n´esclavos. Los mozos d´Asturies tienen que facer lo que nós, un poco más tayudinos, nun fomos quien a facer: ¡Proletarios asturianos, xuntaivos!



INDEPENDENCIA Y SOCIALISMU